I

Quand lou souleias rabino la plano,
Que sus lis estang danson li belu
A ras dis engano,
Urous quau, bloucant sa sello gardiano,
S’en vai libre e soul sout lou grand cèu blu ;
Quand lou souleias rabino la plano,
Urous quau s’en vai sout lou grand cèu blu.

II

Mai quouro, à l’errour, lou larg se rouviho,
Que sus mar lou jour se vèi davala
Darrié la mountiho.
Quand vers la falun la mounturo endiho,
Urous quau, gardian, vai s’encabana ;
Mai quouro, à l’errour, lou larg se rouviho.
Urous quau, gardian, vai s’encabana.

III

Aro qu’an tourna li tèms d’abrivado,
Buten nosti biòu sus li calado
En revoulunado ;
Au noum dóu pais e de la manado,
Mantenen, gardian, noste vièi coumbat ;
Aro qu’an tourna li tèms d’abrivado,
Mantenen, gardian, noste vièi coumbat.

IV

Coumpagnoun, d’aut, d’aut, e parte à grand erre,
Entaiolo-te, sello toun chivau
Que-te vènon querre ;
Plego toun seden, aganto toun fèrre,
Per la tradicioun fau douna l’assaut ;
Coumpagnoun, d’aut, d’aut, e parte à grand erre,
Per la tradicioun fau douna l’assaut.

V

Mi fraire gardian, sian qu’uno pougnado,
Mai sauvan la terro e l’us naciounau
De la mau-parado ;
E belèu qu’un jour, la Race aubourado
Boumbira, deliéuro, à noste signau ;
Mi fraire gardian, sian qu’uno pougnado,
Mai sauven la terro e faguen signau !

JOUSE D’ARBAUD.