En lengo nostro (3).

samedi 8 juin 2013, par Simbèu

Seguido e finicioun dóu conte "SOUTO LOU TIHÒU"...


SOUTO LOU TIHÒU (3)

Mai èro pas la caniculo que nous fasié susa ni-mai la fam que nous estenaiavo l’estouma ! Mameto que lou sabié bèn nous respondeguè en risènt :
_"Bedigas, aguès pas la petocho coum’acò ! Es soulamen dins vòsti pichoti tèsto que i’a un brau... o un ase belèu ! Urousamen d’aiours ! Que fariéu, iéu, emé mi vièi cambo s’avias resoun ?".

Pièi nous poutounavo pèr nous rassegura. Sa lougico e encaro mai sa tendresso finissien pèr l’empourta. Poudié countinua !
_"Escoutas pulèu ço qu’arrivè un jour à l’Enclos, aquesto famouso annado que "Lou Prouvènço" ié venguè courre. Vo mi cacalaus, èro en... 1908 !".

En aquest moumen sis iue se perdien dins un cantoun dóu cèu clar ount’anavo cerca li souveni de sa jouvènço. Fau dire qu’avié gaire manca de courso dins noste plan e la magio di mot recoumençavo, mesclado à l’incessanto tambourinado di cigalo sadoulo de calour. De si cra-cra-cra sacada, nòsti musicarello aludo bacelavon lou ritme de la faradoulo finalo de "L’Arlatenco", la meme qu’aquelo que ressounavo dins nòsti cor.
Nous coungoustavian sèmpre que mai ! Dins l’areno luminouso de nost’imaginacioun, Lou Prouvènço, Lou Senglié, Lou Bandot, Lou Vovo, L’Artihé, L’Ourfelin, Gandar... refasien si pus bèu cop de barriero souto nòstis iue esbalausi e dubert sus lou meravihous. Pièi evoucavo la Camargo.

Nous enmenavo dóu coustat di Santi-Mario de la Mar, au bèu mitan di palun e dis engano, dins de manado bressado entre li bras dóu Rose. Dins aquest viage irreau cavaucavian tóuti tres sus d’ègo blanco auprès de fièr gardian.
Nous parlavo tambèn dóu Marqués de Baroncelli que lis avié canta. De l’aut de nòsti cinq an pantaiavian à-n-aquesto terro fabulouso qu’entre-vesian à l’avalido d’un inassessible mounde paradisien, coum’un mirage que s’alucho d’à mesuro que creses lou touca !

Vuei e maugrat lou tèms, la vese encaro coum’acò ma Camargo, meme se l’ai travessado mai d’un cop despiè !

Mai… E lou biòu escapa em’acò ?... Èro encar’aqui !

N’avian toujour pòu d’aquesto bèsti incouneigudo, autant feroujo qu’atrairanto, mai l’amavian adeja. Avian coumpres que nous faudrié bèn l’afrounta un jour l’anti Animau que tèn entre si bano lou courage e l’estrambord di Prouvençau ! Ansin s’acoumplirié inmancablamen lou necessàri rite iniciau que nous farié passa dóu jouvènt à l’ome. Pus tard, uno fes lou pas franqui, fuguè à noste tour de gramacia coume poudian la caro Grand de ço que ié devian.

Avié pas liuen de nounant’an e sourtié pus dins lou vilage, franc de… la bourgino. Mau-grat soun grand age, tenié toujour à vèire lou biòu, mai pas de la fenèstro de l’oustau coume l’aurié vougu ma maire !

Adounc, dos fes l’an, la pourtavian dins soun fautuei (èro toujour lou meme) au rode qu’avié chausi, à saupre darrié la grasiho de la cour que fai fàci au Camin dis Areno. Èro aquelo dóu Cafè Mouderno de l’epoco. D’aqui disié ’mé resoun, poudrié miés vèire l’embourgina davala dins lou vilage pièi pus tard lou regarda rintra forço las à l’Enclos.

Revese encaro soun ris e si picamen de man quouro la boumbo anounçavo que l’avien bandi. Èron li meme que li nàutri quàuquis annado peravans quand nous gardavo souto lou tihòu !

Que bonur pèr elo se d’asard reçaupié quàuquis espouscaduro di jo que se praticavon d’aquest tèms : se lançavo d’estoupin, de poumo d’amour mai que maduro, d’aigo… e li marco de nòsti man barioulado restavon long-tèms sus la pèu di chato. En siéu segur aro : coume mai d’un dins la foulo en finfo, esperavo qu’acò... au grand dan de sa chato Justino !

Vuei quand vau i biòu, me semblo de bèlli fes que pas liuen de iéu, l’oumbro d’uno vièio femo passo coum’un nivo lóugié sus lou round nega de lus. Alor revivèn un istant ensèn, enca’cop, l’istòri magico de moun enfanço que countunio lou Biòu divinisa.

Vo, seguramen, es aqui souto lou tihòu dóu mas, à la sousto dóu cagnard e en escoutant ma Grand Rosa, qu’ai aganta coum’un cop de soulèu la Fe di Biòu !


Simbèu

Bouvino e Lengo Nostro

Mots-clés

Accueil du site