"MOUN PANTAI", POUEMO A CAMARINA

dimanche 18 décembre 2011, par Simbèu

EN ÓUMAGE AU TRIPLE BIÒU D’OR

L’ai fa en prouvençau
Que de segur es la lengo di brau...

.

.
Moun pantai uno niue me counduguè en Crau,
Entre mitan di roure, soulet, senso chivau.
Ié cercave li brau que sabiéu assousta
Pèr li vèire mai proche dins sa tranquileta.

Ausiguère subran, à travès li ramuro
Un alen sacada, coum’un voulcan murmuro….
De pas que martelavon li caïau amoula...
Alor un frejoulun me faguè tremoula.

Trepassant ma trembleto, cridère dins la plano :
"Quau siés, tu qu’ai vist lusi li bano ?"
E dins l’escuresino l’oumbro respondeguè :
"Iéu siéu Camarina ! Siéu lou Biòu di Chauvet !

Ai fa l’obro vougudo pèr ounoura moun sang
Ai pourta ma manado enjusqu’au pus aut rang,
Toun pople gardara de iéu la souvenènço
E restarai pèr éu lou Segnour de Prouvènço.
Sabe mount’es ta Fe, te farai pas de mau
E podes me touca s’acò te fai tant gau".

De ma man impaciènto caressère soun pèu
Que me semblè velout souto lou negre cèu.
L’auriéu vougu mai long moun pantai de bouvino
Que me fasié charra emé la sóuvagino,

Auriéu vougu tambèn ié caressa li bano
Touca encar’un pau sa tèsto abelano,
Mai sus un rai de luno la Bèsti s’enaurè
Rejouine eilamoundaut pèr un camin secrèt,
I sansouiro eternalo de si pelot lou cor
Tenènt intre si bano tres troufèu dóu Biòu d’Or.


Simbèu

Poésie

Mots-clés

Accueil du site